مدونه مصطفي محمود

أعتقد أن الشخصيه الأهم في حياتنا, هي الشخصيه اللي بتبقي بعيده تماما عن أغلب الناس اللي نعرفهم في حياتنا, لأنها بتبقي الشخصيه الوحيده اللي هنقدر بمنتهي البساطه نحكلها عن كل شئ في حياتنا من غير ما نخاف أن كلامنا وفضفضتنا دي توصل لحد من صحابنا أو الناس اللي نعرفهم, هنبقي مطمنين وأحنا نحكي عن الناس اللي بنحبهم ومش عارفين نقولهم اننا بنحبهم, هنبقي مطمنين وأحنا بنحكي عن أخطائنا, هنبقي مطمنين وأحنا بنحكي عن أحلامنا وعن مخاوفنا وعن أوجاعنا, مش هنبقي خايفين من اي سكرين شوت يتبعت لحد نعرفه يخلينا عرينين قدامه, هنبقي مطمنين واحنا بنسمع رأيهم في حلول لمشاكلنا لانهم مفيش اي حاجه مأثره عليهم أو ليهم مصلحه من ورا النصيحه دي غير مساعدتنا فعلا, الشخصيه البعيده عن الباقيه فعلا الأهم, حاولوا تدوروا عليها, تخلقوها في حياتكوا, هتفرق معاكم كتير, أوقات بيبقي جوانا كلام كتير بس مش لاقين حد مناسب نحكيه لي بالرغم من أن حوالينا ناس كتير قريبين ..

تقريبا كدا عدي سنتين إلا كام شهر وانا سيجنل, وأنا لوحدي, اطول فتره عدت عليا من غير ما أحب وأرتبط ببنت, بغض النظر اني اكتر حد في الحياه ممكن تلاقوه عنده صحاب بنات إلا أني برضه حاسس بالوحده جدا, إحساس الحب والونس اللي بيخلقه الحب حاجه تانيه خالص مختلفه عن إحساس الصداقه, مش هقول أني قافل علي نفسي وقلبي, بالعكس أنا حاولت كتير أحب, بس أنا بقيت حاسس أني الأحساس دا مش هعرف اوصله تاني ولا هو عارف يوصلي تاني وطريقنا لبعض بقي فيه سور طويل محدش فينا عارف يتخطها ويوصل للتاني, أو تقريبا أنا بدور علي حاجات تقريبا مش موجوده ومش هلاقيها في أي بنت, كنت ف كل مره بقرب من حد جديد, ااقول بس هي دي, هو دا اللي كنت بدور عليه, تعدي فتره صغيره بس وأكتشفها أكتر ألاقي نفسي مش حاسسها برضه, وأقول لنفسي لا برضه مش هي دي, وقلبي مفيش منه أي إشارات خارجه بتدل علي أن فيه حاجه, ف أبعد وابتدي أدور من جديد, مش هكتب مواصفات, بس أنا هكتب عن إحساس, أنا عايز أتخطف, انا عايز اول ما اشوفها اسمع نبضات قلبي بتدق أعلي من صوت رنه الموبيل وصوت لانا دل راي, عايز أول ما أشوفها ارمي كل حاجه ف إيدي والدنيا تسكت حواليا اول ما تحضر وع...

نشالله لو حصل ف يوم وأتجوزت, البنت اللي هتجوزها هعمل كل ما في وسعي عشان أخليها موجوده, عايشه, حاسه بوجودها, مش هسجل رقمها علي الموبيل “ الجماعه, البيت, أو أم حسين “ لا هكتب أسمها علي الموبيل, هنادي عليها في الشارع ب إسمها مش ب إسمي, صورنا هتبقي مغرقه الفيس والأنستجرام, هي مش حاجه لازم أخبيها تقريبا, مش هطلب منها باسورد الفيس بوك ولا هفتش ف موبيلها كل شويه, لو مش واثق فيها يبقي أتجوزت ليه؟, هاخدها معايا في كل المناسبات والعزومات, هخلي حياتي هي حياتها, عارفه كل تفاصيلها, هروح معاها كل افراح صحابها, مش هخليها تحس انها لوحدها ابدا, همشي جنبها ف الشارع بالملي, مش هبقي ماسك إيد ولادنا وهي ورايا شايله الشنط, حياتها قبل مني هتفضل حياتها هي هي معايا, صحابها من الجنسين في الكليه أو ف الشغل مش أنا اللي هختار مين المناسب فيهم ومين اللي مش مناسب, هي ربنا خلقها بعقل برضه تقدر تميز بيه الكويس من الوحش, لو مش محجبه هتفضل مش محجبه لو هي مرتاحه كدا, هنصحها بالحجاب من باب النصيحه مش من باب أنه أمر مني ولازم يتنفذ, أحنا بنخلط ما بين الغيره والحمشنه وما بين أننا بنلغي كيان البنت تماما, وفاكرين أن...

جميعاً بلا إستثناء عندنا أكتئاب, الفرق الوحيد بيكون في نسبه الأكتئاب ما بينا ومدته معانا قد ايه, خليني أقول أن الإكتئاب من أصعب الأمراض النفسيه في الحياه عموما, المكتئب بدرجه كبيره بيبقي أأقل شخص عنده المقدره أنه يحافظ علي الناس اللي حوليه, بالأضافه أنه يقدر يثبت فتره طويله في علاقاته الأنسانيه مع الأشخاص بوجه عام, بيبقي أكتر حد شفاف جدا, بيصرح بمنتهي السهوله والبساطه ب أي حاجه حاسس بيها مهما كانت حلوه أو وحشه بدون اي تردد او خوف, رد فعله علي اي حادث في حياته بيبقي ضعيف جدا,  حب أو كره, حدث سعيد أو حدث مؤلم, مش لانه بارد او مبيحسش, لكن لأنه ببساطه معندهوش أي طاقه للتفاعل مع اي أحداث بتحصل قدامه, الأكتئاب دايما عند الأشخاص اللي دمهم خفيف بيبقي في أسوء درجاته, لانهم ببساطه بيبقي كل شئ بيدور في الكون حواليهم داخل في حيز سخريتهم, بياخدوا المواقف دايما بسخريه بسيطه مع إبتسامه صغيره وبينتهي الموضوع بالنسبالهم بدون اي رد فعل, الكلام مع الشخص المكتئب وتحفزيه علي التغير من نفسه بيكون شئ غير مثمر بالمره, طاقته بتكون صفر, تفكيره صفر, ومهما حاولت معاه وحاول يخرج من إكتائبه بيجي في نص الطريق و...

الفكره انه في حياتي بشوف وبقابل وبعرف بنات كتير، وكتير منهم بيكونوا حلوين جدا، بس الأكيد والطبيعي والعادي ان مهما كانت حلاوتهم وجمالهم لازم الواحد يبقي متماسك وتقيل قدامهم ومش مهتم، لكن انتي الموضوع معاكي مختلف تماما، الموضوع معاكي بيكون أشبه بالمستحيل، التماسك والتقل والصمود والثبات قدام عيونك هيكون مستطنع بشكل بشع، الحاجات الحلوه اللي زيك حلاوه “ أوفر دوس “ ماينفعش نتماسك قدامها ولا نعمل اننا تقال وجامدين وانه عادي يعني مش اي جماال يقدر يبهرنا، كل االي ف ايدينا اننا نسرح مع ملامحك ونسيب نفسنا وروحنا قدامك ونحبك وخلاص من غير ما نحط لروحنا قيود، وبدون تمثيل متعب ومرهق لينا بشكل مبالغ فيه بالتجاهل لجمالك الصارخ لانك ببساطه جميله، جميله جمال أوفر دوس .. 

فكره الخلط بين إنك تكون بتحترم شخص لانه في النهايه إنسان زيه زيك, وتكون ضد قاتله, أو تهجيره من مسكنه, أو إرغامه عن العدول عن ميوله أو إتجاهاته بالقوه وبين أنك تكون متفق معاه, و راضي عن اللي بيعمله وشايف إنه شئ جميل وعادي, غلط كبير .. فرق كبير بين أني اكون بتكلم مع ملحد, مع مثلي, بنتبادل الأحاديث, وبين اني اكون راضي عنه, او معجب بيه أو شايف أنه عادي .. فرق كبير بين ان يكون واحد زي حامد سنو مغني باند مشروع ليلي شاذ جنسيا وبكون بسمعله اغانيه كلها وحافظها وبحب المزيكا اللي بيعمله ا وفرق بين اني اكون معجب بميوله الجنسيه وشايف أنها صح وانه شخص عادي ..  أنا مؤمن إن الناس حرين في تصرفاتهم وربنا بيحاسبهم عليها, أنا ماليش دعوه, وانت ملكش دعوه. كل بلد حره في نفسها, ولكن من المؤكد أن قانون زي اللي اتطبق في أمريكا من رابع المستحيلات ومهما حصل مستحيل أنه يطبق في بلد هوايتها إسلاميه, وأحب افكر كل الناس اللي شايفه أني دي حريه, وأنه هيبقي شئ لطيف وجميل لو أطبق هنا في مجتمعنا ب الأيه الكريمه " إن الذين يحبون أن تشيع الفاحشة في الذين آمنوا لهم عذاب أليم في الدنيا والآخرة " .. شكرا ..

مفيش أحلي من التخيلات اللحظيه اللي بتجيلك في مواقف معينه, التخيل اللي بيصورلك نفسك بتعمل حاجه نفسك تعملها اوي بس ماسك نفسك عنها لانها حاجه مش طبيعيه أو خارجه عن المألوف, ف بتتراجع عنها وبتكتفي ب إبتسامه تنهي بيها تخيلك دا وترجع تاني لأرض الواقع, التخيل اللي بيجيلك ب إنك بتلطش حد علي وشه وهو بيتكلم قدامك عشان نرفزك, بيبقي تخيل جميل ومضحك وفي نفس الوقت بتضايق عشان نفسك تعمله لكن مينفعش, التخيل اللي بيجيلك لما بتبقي نفسك تحضن حد قالك كلمه فرحتك, التخيل اللي بيجيلك لما تبقي واقف ف ي مكان عالي ونفسك تنط وتجرب إحساس أنك طاير, التخيل وانت بتقول لحد مبتحبهوش إنك بتكره في وشه, او حد دمه تقيل أنه دمه تقيل وسخيف اوي, التخيل اللي بيجيلك لما تبقي مشدود لحد بعيد عنك وتلاقي نفسك بتكلمه فجأه من غير اي سبب مقنع, التخيل في كل موقف حلو شفته في فيلم وكان نفسك يبقي حقيقه وتكون انت بطل المشهد, تخايلتنا جميله, بتبقي غالبا مدهشه وفيها شئ من الجنان, لو قدرتوا تحققوا اي تخيل يجي في دماغكوا اعتقد إنكوا هتتخلصوا من مشاكل نفسيه كتير جواكوا, اه ممكن تحصلكوا مشاكل كتير بس هتبقوا أشخاش احسن, اطلقوا سراح تخيلتكوا و...

غالبا البني أدم اللي بيكون مضطر يكدب بيكون شخص مش حر، مش حر نفسه حرفيا، الناس اللي بتكدب بيكونوا مثيرين للشفقه مش العكس نهائيا، نفسيتهم بتكون مش مرتاحه طول الوقت، إحساسهم انهم دايما بيقولوا حاجات غصب عنهم، حاجات غير اللي جواهم، حاجات وهميه مضطرين دايما يقولها للنجاه بعلاقه، او للهروب من نظره إحراج، أو لتجنب مشكله محتمله الحدوث بيخليهم دايما حاسين بالذنب وتأنيب الضمير المستمر وبيكون احساس مرهق فعلا، انا عايز اقول لكل حد بيكدب لاي سبب كان متكدبش، اعملوا مثلا فتره صراحه في حياتكوا لمده اسبوع مثلا، قولوا كل حاجه جواكوا لاي حد بمنتهي الصراحه، لو مش طايق حد روح قوله مابطقكش، بتتسلي بحد وعامله مكعب سكر يحلي حياتك لفتره روح قوله، بتحب حد ومصرحتهوش روح قوله، وعدت حد وعد ومش هتنفذه روح قوله، بس متكدبوش، متكدبوش لان الكدب مابيتعبش حد غير صاحبه ذاته ..

والاخوه والاخوات بتوع صوره المصاصتين، المصاصه المتغطيه الجميله اللي مش عليها نمل والمصاصه المكشوفه اللي كلها نمل، ياريت تبطل سخافه، حضرتكوا لو المصاصتين اتحطوا في مكان نضيف مفيهوش عقليات مريضه ومتحرشين وشباب بعقول شغلها الشاغل الجنس فقط لا غير هتلاقوا المصاصتين نضاف، نقول تاني ان وجود الحجاب او عدم وجوده ملهوش علاقه تماما بعفه البنت وادبها واخلاقها، قلع الحجاب ذنب لكن مش نوع من انواع الفجور، مش شئ معيب، اتعملوا مع الناس علي اساس اللي ظاهر منهم مش علي اساس مناظرهم، مش حجابهم او عدمه، مش هدومهم، ارتقوا ..

يا جماعه الناس الجميله لازم نقولهم انهم ناس جميله، لازم نقولهم انهم حلوين من غير اي كسوف او مخاوف مستقبليه من رد فعلهم، من غير اي مصلحه منتظره او هدف مرتقب، قولوا يا جماعه لناس الحلوه انهم حلوين علشان هما لازم يعرفوا انهم حلوين، والجمال مش جماال من بره بس، في ناس جميله بروحها، بحضورها، بضحكتها، بمواقفها، المهم قولوا لاي حد جميل بتتعكبلوا فيه في حياتكوا انه جميل

إحساس أول مره .. إحساس أول مره في كل حاجه بيبقي فيها حدث في حياتك بيكون الأجمل دايما, ولسبب غير معلوم مش بيتعوض تاني, إحساس أول مره بنفهم فيها يعني إيه عيد, يعني إيه هدوم جديده, يعني ايه سهر لحد الصبح عشان نصلي العيد بقي بيقل تدريجياً مع كل عيد بيعدي علينا لحد ما بيتلاشي تماما, لدرجه ان بيجي عليك وقت بتحس أن فيه العيد اصلا ااقل من الأيام العاديه, إحساس اول يوم تدخل فيه المدرسه أو الكليه أو تروح تشتغل في مكان جديد بيبقي في أوله فيه شئ من الأبهار والرهبه,فرحه علي شويه قلق, ومع  الوقت ومع الأيام اللي بتعدي عليك بيختفي الأحساس دا بشئ من الملل لحد ما ف النهايه بينتهي ويبقي روتين, أما عن إحساس اول مره تحب, بيبقي فعلا احلي مره, اكتر مره بتبذل فيها مجهود عشان العلاقه تستمر, اكتر مره بتحس بفرحه وانت بيتقالك بحبك وبتقولها, أكتر مره بتحس أن حياتك أتغيرت وبقي فيها شئ يستحق الحياه, وللأسف بعد ما بتنتهي العلاقه وتحاول تدخل في علاقه تانيه بتلاقي نفسك كدا من الأخر " ملكش نفس " .. معندكش طاقه تبدأ حكايه من جديد, بتلاقي الأحساس بالتجربه دي أختفي من جواك ومهما دخلت في علاقات بعد كدا ومهما سعيت...

بتخيل نفسي في العقد الخامس من عمري " سن الخمسين " في كافيه علي البحر الساعه العاشره صباحاً والدنيا بتمطر وأنا ماسك الكاميرا بتاعتي وبتفرج علي كل الصور اللي صورتها من وقت ما كان عندي 22 سنه لحد اللحظه دي .. متخيل ؟ ولأني شخصيه بتحب تبص لنص الكوبايه المليان تخيلت اولا عدد الأبتسامات اللي ممكن هبتسمها لما هشوف صوري مع ناس فضلوا معايا لحد اللحظه دي, عدد الأبتسامات عن كل صوره بذكريتها ووقتها ومناسبتها ومكانها والموقف اللي حصل قبل ما تتاخد الصوره وبعد ما أتخدت, عدد الأبتسامات عن ال شخص دا بقي عامل إزاي دلوقتي وكان عامل إزاي وقت ما أتصورنا , هتخيل كمان كم الحزن اللي هيكون جوايا مع كل صوره هشوفها لشخص مبقاش موجود معايا ساعتها لأي سبباً كان , سفر, خلافات , موت , تلاهي وإنشغال, وعشان كدا كل اللي هيكون هممني وقتها وأنا بتفرج علي الصور أني أكون عشت تقريبا كل يوم في حياتي من غير ما أضيع ولا ثانيه, وأني أكون كونت أكبر عدد من الذكريات مع كل الناس اللي بحبها, أكون شاركت كل واحد فيهم فرحه وحزنه ومناسباته ومشاكله ومشاويره التافهه قبل المهمه, كل اللي هيكون هممني فعلا أني أكون وأنا ماسك الكامي...

بصوا . هي حياتنا عموما لو ركزنا في الأحداث المهمه اللي فيها, لو ركزنا في أحلامنا, أهتمامتنا, لو ركزنا في الكليه, في الشغل, في الظروف , ف المشاكل, دي حاجات كلها كفيله انها تخلينا ننتحر, الحياه الحلوه في التفاصيل , في الضحك اللي ف وقته , الهزار اللي بيجي ينسيك حاجه مضايقاك ولو حتي وقتي ,لمة الناس اللي بتحبهم ,الصدف الحلوة والأحلام اللي بتحلمها وتصحي تلاقيها منورالك وشك من كتر الأبتسام ,الناس اللي بتبعتلك قلب ف رسايلها وهيا بتكلمك ع النت وبتبقي قاصداه فعلا ,حضن والدتك والناس الل ي بيعرفوا يكونوا أهلك وهما مش أهلك ,والناس اللي بيحسسوك وانت بتتعامل معاهم انك حته منهم ,لحظات استمتاعك بالرغي حتي لو محدش بيسمعك ,الحد اللي بيحب يبسطك والناس اللي بتحب تبسطهم وتحب تبقي مبسوط عشانهم ,الغرباء اللي بيردوا الابتسامات بمثلها, أغنيه بتحبها تشتغل في مكان انت موجود فيه, الصوره اللي بتطلع جميله وتبقي فرحان بيها اوي بغض النظر عن مكانها ووقتها, منظر المطر من ورا إزاز في كافيه, صنيه مكرونه بشاميل غير متوقعه, الصبح بدري ومواصلات الصبح بدري,الناس الطيبيين اللي مبيبقاش بينك وبينهم حاجه بس عارف انهم بيحبوك وبيد...

لسه مش قادر أفهم الناس اللي بتحكم علي الناس من مظهرهم الخارجي, خصوصا الحكم علي البنت, لبس البنت وعدم إرتدائها للحجاب في الأول وفي الأخر معصيه, لكن عمرهم ما كانوا مقياس لأخلاقها أو هي كونها محترمه أو لا, إيه علاقه اللبس والحجاب بالأحترام؟ فين الرابط؟ عايز تحكم علي بنت ولو أن دا مش من حقك اصلا يبقي تعرفها, مش تحكم عليها من لابسها وشعرها, تعمقوا يرحمكم الله ..

من وانا صغير لما كانت بنت في عيلتنا تنجح كانت صيغه المباركه بتبقي عباره عن " عقبال ما نفرح بيكي " .. لو اتعزمنا عند حد والبنت اللي ف بيت كانت بتبقي عامله اي نوع من الأكل الموجود علي السفره كان بيبقي الأطراء الوحيد " عقبال ما تطبخي لعريسك " .. لو بنت جابت فستان جديد وورته لصحابها بتبقي الجمله المعتاده علي رأيهم في الفستان " عقبال فستان فرحك " .. لو خدت صوره وحطها صوره بروفيل 95% من الكومنتس بتبقي عباره عن " عقبال صور فرحك " .. لو واحده جاهله بس متجوزه شخص كويس وفيه واحده تانيه  في نفس عيلتها أو عمارتها واخده دكتوراه في اي مجال وبتشتغل في وظيفه ليها مركز إجتماعي مقبول جدا, بتتشاف الجاهله علي أنها كامله والحاصله علي دكتوراه وبتشتغل بتتشاف علي أنها ناقصها حاجه لسه وهي طبعا الجواز .. بشكل او ب أخر مجتمعنا حصر البنت في فكره أن الجواز والعريس والفرح دول أهم وأقيم وأعلي هدف ليها في الحياه .. واي شئ تاني مهما كان فهو مجرد كماليات حتي لو كان شئ جوهري زي العلم والعمل, ودي كارثه فكريه في كل الأحوال, من وجهه نظري أنا شايف ان اي بنت مش محتاجه للجواز قد ما محت...

تسألني ايه أكبر جريمه ممكن ترتكبها في حق نفسك. هقولك انك تحكم علي نفسك من خلال كلام الناس هنا. أو تغير تصرفاتك أو نفسك عشان ترضي حد أو تعجب حد . المجتمع دا بقي عامل زي المصطبة الكبيره والناس بقت قاعده عليها تعيب علي دا وتذم في دا. الولد اللي عامل ضفيره دا واد فرفور والبنت اللي لابسه جينز ضيق دي شمال. والست المنقبه دي ورا نقابها حاجه واللي مربي دقنه دا عامل فيها شيخ. والبنت اللي ليها صحاب ولاد مش متربيه والوله اللي عنده هدوم كتير دا متدلع والبنت اللي مش محجبه سايبه. والوله الل ي بيجيب شعره علي جنب فلاح .. هنا بيحكموا عليك بس ظاهريا من غير اي محاوله لمعرفتك معرفه شخصيه. اكتر ناس بتعجبني فعلا الناس اللي عايشه حياتها عشان يرضوا نفسهم فقط لا غير وطظ ف الناس .. من الحاجات اللي عمري ما هنساها البنت اللي وقفت تاكل علي عربيه فول وطلبت مخلل من الراجل جنب طبق الفول وخلت صاحبتها تصورها وهي بتاكل عشان تفضل فاكره انها عملت حاجه ف نفسها ومهمهاش كلام الناس. والبنت اللي كانت راكبه موتوسيكل وكان كل الناس بتبصلها ب استغراب وانا كنت واقف في الشارع وهي مهديه قدامي وكان نفسي اقولها برافو. والولد اللي قرر ي...

مفيش حياه حلوه من غير ما يكون فيها حد بيحبك بجد, حد واقف جنبك علي طول, مخليك واخد ثقه في نفسك حتي لو كنت غريب, حتي لو كنت مريض نفسيا او جسديا, حتي لو كنت مابتحبش نفسك اصلا وشايف نفسك مليان عيوب, أو مش مقبول عامه, وبغض النظر عن مصدر ونوع الحب دا إيه .. مفيش مكان حلو من غير ونس حتي لو كان احلي مكان في الدنيا, مفيش مكان حلو ومبهر من غير حد تشاورله على التفاصيل اللي لافتة نظرك و يستوعب سبب إنبهارك إيه, كمان مفيش ضحكه حلوه كامله من غير صدى صوت ضحكة مألوفة ومحبوبه ترن معاها .. ا لحياه عموما عايزه أرواح خفيفه, وناس قادره تعمل الفرق وقت ما تكون معاهم, وتحس بغربه وإختلاف رهيب وهما مش حواليك, الحياه محتاجه ناسه رايقه تقدر تاخدك وتسحبك من حياتك كام ساعه تنسيك فيهم اي حاجه وتوقف عقلك عن التفكير في اي شئ حتي لو عندك مشاكل الكون .. علي هامش كل حاجه عمري ما عرفت احدد احساسي بالظبط تجاه البحر, ما بين حبي لي اوقات واوقات تانيه إحساس بالكأبه بيزرعه جوايا اول ما بيكون علي مرمي بصري وما بين احساس ب اللهفه اول ما ببتدي اشم ريحته وما بين خنقه اول ما بكون قدامه, يمكن لأنه أكتر مكان بيعبر عن حياتي دل...

عمق العلاقات بينك وبين شخص تاني مش بيكون بعدد السنين و لا بعدد الأسرار ولا بيكون لأنكم قرايب أو متربيين مع بعض أو صحاب من المدرسه أو جيران في نفس العماره, عمق ا لعلاقة زي اي حاجة في الدنيا شئ نسبي, فيه ناس بيشاركوك كل اسرارك, كل لحظات حياتك, موجودين معاك في كل صورك, بس علاقتك بيهم على كف عفريت و ناس علاقتك بيهم مبتتعداش معلومات أساسية بس بتحس معاهم بترابط غريب, وناس تانيه بعيده عنك بمسافات ممكن تكون بتشوفهم مره او اتنين في السنه بس أأقرب ليك من ناس معاك بتشوفهم كل يوم, وناس تانيه تعرفهم بقالك بالكتير شهر او اتنين بس حضورهم طغي علي وجود ناس في حياتك من سنين, عمق العلاقات في وجهه نظري مش مرتبط ب أي مده, او مواقف, او ذكريات, عمق العلاقات بيكون عباره عن حاله, شئ مبهم وغريب بيشدك لشخص تاني بتكون بترتاح في وجوده وبتعرف تكون نفسك من غير أي إستطناع, بتعرف تحكي اصغر تفاصيل حياتك مهما كانت تافهه بمنتهي الأريحيه, بتلاقي نفسك مبسوط حتي من غير ما تكلموا, بعيداً عن كونه مين, يقربلك إيه, أو تعرفه من إمتي ..

الحكايه كلها بتبدأ أن طرف في العلاقه بيتطوع أن يقوم بكل الأدوار, بيتطوع أنه يبقي أخ, أب, أم, صديق, حبيب, وفي المقابل الطرف التاني بيوافق وهو مصدق أن دا ممكن يحصل فعلا, بيوافق وهو علي ثقه في أن الطرف التاني هيقدر يقوم بكل الأدوار, بيبصوا لبعض, بيشبكوا إيديهم مع إبتسامه صافيه, ويقرروا يبنوا السور, يعلو السور وطوبه ورا طوبه وهما عندهم حماسه وبيبصوا لبعض وهما بيضحكوا وفي منتهي السعاده بيحاولوا يعلو السور في اسرع وقت, ومع الوقت السور بقي عالي جدا, ناموا وصحيوا وهما في حاله رضي تام , بس أكتشفوا مع الوقت أن صوت ضحكهم بقي متكرر, كلامهم بقي متعاد, حتي افعالهم بقت معتاده ومتوقعه من كل طرف, وشهم في وش بعض طول الوقت, حاولوا يغيروا لون السور, لونوه كل يوم لون مختلف يمكن يحسوا بفرق أو حدث جديد, لكن نفس النتيجه, الملل السم القاتل لأي علاقه كان خلاص خد حيز كبير في حياتهم, اللي نفسه أطول عاند وقال هستحمل واللي نفسه أأقصر مستحملش وعمل فاتحه ف السور وقرر يهرب, لأنه ببساطه كان من رابع المستحيلات ان طرف واحد يقوم بجميع الأدوار .. مين قال إن الأرتباط يعني سجن؟ مين قال عشان نرتبط بشخص ما يبقي لازم نعزل نف...

من وأنت صغير بيتبني في عقلك مفهوم محدد ملهوش أي وجود غير في المربع اللي حواليك أنت وبس، لو مغسلتش سنانك قبل ما تنام امنا الغوله هتاكلك بليل، بتقوم تغسل سنانك كل ليله وأنت مصدق أن امنا الغوله هتاكلك لو كسلت او نسيت مره تغسل سنانك، ومهما أتقالك من بره المربع اللي انت موجود فيه أن مفيش حاجه اصلا اسمها أمنا الغوله بترفض تصدق، بترفض تفكر، بترفض تسمع، وبتبقي مصدق اللي اتقالك في مربعك مهما كتر عدد الأصوات اللي بتقولك أن مفيش امنا الغوله، بتخاف حتي تجرب متغسلش سنانك ليله وتشوف يا تري  فعلا امنا الغوله هتطلع تاكلك ولا دا وهم كنت مصدقه واتخدعت فيه، بتمر الأيام وبتكبر وبيكبر معاك المربع اللي انت عايش فيه وبتتجزأ امنا الغوله لكذا مكان وطريق ف حياتك، بتتحول لكل إعتقاد بتكتسبه من المربع الكبير اللي انت عايش فيه وهو مجتمعك، بتفضل عايش بنفس الطريقه، وبنفس تصورك ان فعلا امنا الغوله موجوده في كل جزء في حياتك، بترفض تغير، بترفض يبقي ليك اي وجهه نظر مختلفه عن المربع، وبكل عند وإصرار قبيله قريش بتفضل مصدق انك صح ومربعك اللي انت كبرت وعايش فيه صح بكل اصنامه صح، واي فكره او حوار او محاوله لتغير مفهومك ع...