صوري

بتخيل نفسي في العقد الخامس من عمري " سن الخمسين " في كافيه علي البحر الساعه العاشره صباحاً والدنيا بتمطر وأنا ماسك الكاميرا بتاعتي وبتفرج علي كل الصور اللي صورتها من وقت ما كان عندي 22 سنه لحد اللحظه دي .. متخيل ؟ ولأني شخصيه بتحب تبص لنص الكوبايه المليان تخيلت اولا عدد الأبتسامات اللي ممكن هبتسمها لما هشوف صوري مع ناس فضلوا معايا لحد اللحظه دي, عدد الأبتسامات عن كل صوره بذكريتها ووقتها ومناسبتها ومكانها والموقف اللي حصل قبل ما تتاخد الصوره وبعد ما أتخدت, عدد الأبتسامات عن الشخص دا بقي عامل إزاي دلوقتي وكان عامل إزاي وقت ما أتصورنا , هتخيل كمان كم الحزن اللي هيكون جوايا مع كل صوره هشوفها لشخص مبقاش موجود معايا ساعتها لأي سبباً كان , سفر, خلافات , موت , تلاهي وإنشغال, وعشان كدا كل اللي هيكون هممني وقتها وأنا بتفرج علي الصور أني أكون عشت تقريبا كل يوم في حياتي من غير ما أضيع ولا ثانيه, وأني أكون كونت أكبر عدد من الذكريات مع كل الناس اللي بحبها, أكون شاركت كل واحد فيهم فرحه وحزنه ومناسباته ومشاكله ومشاويره التافهه قبل المهمه, كل اللي هيكون هممني فعلا أني أكون وأنا ماسك الكاميرا وبتفرج علي صوري القديمه محسش أن حياتي راحت من غير ما أكون عيشتها وأنا مبسوط, تكون حياه مضعتش في روتين وايام متعاده شبه بعض والسلام, عايز أخلي كل صوره تخليني مبتهج بشكل يتعب قلبي في السن دا .. ومحسش أني ندمان علي سنين راحت من غير ما أخلق أيام حلوه جدا تنسيني وقتها عجزي عن حاجات كتير مبقاش ينفع اعملها وتخليني راضي بشكل تام عن الطريقه اللي عيشت بيها حياتي والتواصل الأنساني اللي كنت دايما بسعي أنه يكون موجود مع الأشخاص القريبين لقلبي ..