إحساس أول مره

إحساس أول مره .. إحساس أول مره في كل حاجه بيبقي فيها حدث في حياتك بيكون الأجمل دايما, ولسبب غير معلوم مش بيتعوض تاني, إحساس أول مره بنفهم فيها يعني إيه عيد, يعني إيه هدوم جديده, يعني ايه سهر لحد الصبح عشان نصلي العيد بقي بيقل تدريجياً مع كل عيد بيعدي علينا لحد ما بيتلاشي تماما, لدرجه ان بيجي عليك وقت بتحس أن فيه العيد اصلا ااقل من الأيام العاديه, إحساس اول يوم تدخل فيه المدرسه أو الكليه أو تروح تشتغل في مكان جديد بيبقي في أوله فيه شئ من الأبهار والرهبه,فرحه علي شويه قلق, ومع الوقت ومع الأيام اللي بتعدي عليك بيختفي الأحساس دا بشئ من الملل لحد ما ف النهايه بينتهي ويبقي روتين, أما عن إحساس اول مره تحب, بيبقي فعلا احلي مره, اكتر مره بتبذل فيها مجهود عشان العلاقه تستمر, اكتر مره بتحس بفرحه وانت بيتقالك بحبك وبتقولها, أكتر مره بتحس أن حياتك أتغيرت وبقي فيها شئ يستحق الحياه, وللأسف بعد ما بتنتهي العلاقه وتحاول تدخل في علاقه تانيه بتلاقي نفسك كدا من الأخر " ملكش نفس " .. معندكش طاقه تبدأ حكايه من جديد, بتلاقي الأحساس بالتجربه دي أختفي من جواك ومهما دخلت في علاقات بعد كدا ومهما سعيت انها تنجح بتبقي برضه فيها شئ من الملل والروتين وبطعم ااقل بكتير عن أول مره .. إحساس اول مره تسافر, أول مره تجيلك هديه ف عيد ميلادك, أول مره تشتري موبيل جديد, اول مره تقوم وتقع, الموضوع اشبه بفيلم حلو بتتفرج عليه مره, بيعجبك اوي, تعدي فتره وتشوفه تاني إعجابك بيه بيقل, وتعدي فتره تانيه فا تشوفه تالت ورابع وخامس لحد ما بيجي الوقت اللي إحساسك وإنبهارك بالفيلم بيختفي, وبتبقي بتتفرج وانت زهقان, بطاريه إحساسنا بالأحداث بتقل مع تكرار الأحداث والأيام وبتفضل تقل وتقل لحد ما البطاريه تنتهي, والشاشه تضلم وتبقي عايش بتابع وبتتعايش مع كل حاجه ف حياتك إتكررت قبل كدا من غير إحساس بيها .. حقيقي أنا بحسد أصحاب البطاريات اللي لسه مخلصتش اللي بيعافروا وشايفين نور الصبح في بدايه الليل اللي لسه في حياتهم حاجات كتير لسه مبقتش أول مره ..