أمنا الغوله

من وأنت صغير بيتبني في عقلك مفهوم محدد ملهوش أي وجود غير في المربع اللي حواليك أنت وبس، لو مغسلتش سنانك قبل ما تنام امنا الغوله هتاكلك بليل، بتقوم تغسل سنانك كل ليله وأنت مصدق أن امنا الغوله هتاكلك لو كسلت او نسيت مره تغسل سنانك، ومهما أتقالك من بره المربع اللي انت موجود فيه أن مفيش حاجه اصلا اسمها أمنا الغوله بترفض تصدق، بترفض تفكر، بترفض تسمع، وبتبقي مصدق اللي اتقالك في مربعك مهما كتر عدد الأصوات اللي بتقولك أن مفيش امنا الغوله، بتخاف حتي تجرب متغسلش سنانك ليله وتشوف يا تري فعلا امنا الغوله هتطلع تاكلك ولا دا وهم كنت مصدقه واتخدعت فيه، بتمر الأيام وبتكبر وبيكبر معاك المربع اللي انت عايش فيه وبتتجزأ امنا الغوله لكذا مكان وطريق ف حياتك، بتتحول لكل إعتقاد بتكتسبه من المربع الكبير اللي انت عايش فيه وهو مجتمعك، بتفضل عايش بنفس الطريقه، وبنفس تصورك ان فعلا امنا الغوله موجوده في كل جزء في حياتك، بترفض تغير، بترفض يبقي ليك اي وجهه نظر مختلفه عن المربع، وبكل عند وإصرار قبيله قريش بتفضل مصدق انك صح ومربعك اللي انت كبرت وعايش فيه صح بكل اصنامه صح، واي فكره او حوار او محاوله لتغير مفهومك عن اي شئ في حياتك بتقابله بسخريه وإستنكار، بتعيش تعمل وتقول كل حاجه فرضها عليك المربع او المجتمع من غير اي تفكير او سؤال منك ' انا صح ؟ انا ليه بعمل كدا؟ هيجري ايه لو غيرت؟ ' خوفك من امنا الغوله سيطر عليك، مفيش تغير، مفيش رأي تاني، المربع لونه ازرق يبقي لازم تلون نفسك ازرق، لان اي خروج عن المألوف او اي تلون بلون تاني هيدفعك لمواجهه داميه مع امنا الغوله، بس تعرف؟ ولاخر مره هقولك، يا بني مفيش حاجه اسمها امنا الغوله ..