أنتي اهم من العريس

من وانا صغير لما كانت بنت في عيلتنا تنجح كانت صيغه المباركه بتبقي عباره عن " عقبال ما نفرح بيكي " .. لو اتعزمنا عند حد والبنت اللي ف بيت كانت بتبقي عامله اي نوع من الأكل الموجود علي السفره كان بيبقي الأطراء الوحيد " عقبال ما تطبخي لعريسك " .. لو بنت جابت فستان جديد وورته لصحابها بتبقي الجمله المعتاده علي رأيهم في الفستان " عقبال فستان فرحك " .. لو خدت صوره وحطها صوره بروفيل 95% من الكومنتس بتبقي عباره عن " عقبال صور فرحك " .. لو واحده جاهله بس متجوزه شخص كويس وفيه واحده تانيه في نفس عيلتها أو عمارتها واخده دكتوراه في اي مجال وبتشتغل في وظيفه ليها مركز إجتماعي مقبول جدا, بتتشاف الجاهله علي أنها كامله والحاصله علي دكتوراه وبتشتغل بتتشاف علي أنها ناقصها حاجه لسه وهي طبعا الجواز .. بشكل او ب أخر مجتمعنا حصر البنت في فكره أن الجواز والعريس والفرح دول أهم وأقيم وأعلي هدف ليها في الحياه .. واي شئ تاني مهما كان فهو مجرد كماليات حتي لو كان شئ جوهري زي العلم والعمل, ودي كارثه فكريه في كل الأحوال, من وجهه نظري أنا شايف ان اي بنت مش محتاجه للجواز قد ما محتاجه لأثبات ذاتها في اي مجال سؤاء علمي أو عملي, نماذج كتير نعرفها وبنسمع عنها من البنات سافرت بره لوحدها للحصول علي العلم أو للعمل في مكان احسن, وحتي هنا في نماذج كتير قدرت تكسر قاعده " البنت اخرها الجواز وتقعد ف البيت " .. عموما متخلوش الجواز هو أملكوا الوحيد وهدفكوا في الحياه, متخلهوش هو المحطه الأخيره لأحلامكوا .. في حاجات في الحياه أهم ممكن تدوها الأولويه عن التفكير في الجواز ..