تقريبا كدا عدي سنتين إلا كام شهر وانا سيجنل, وأنا لوحدي, اطول فتره عدت عليا من غير ما أحب وأرتبط ببنت, بغض النظر اني اكتر حد في الحياه ممكن تلاقوه عنده صحاب بنات إلا أني برضه حاسس بالوحده جدا, إحساس الحب والونس اللي بيخلقه الحب حاجه تانيه خالص مختلفه عن إحساس الصداقه, مش هقول أني قافل علي نفسي وقلبي, بالعكس أنا حاولت كتير أحب, بس أنا بقيت حاسس أني الأحساس دا مش هعرف اوصله تاني ولا هو عارف يوصلي تاني وطريقنا لبعض بقي فيه سور طويل محدش فينا عارف يتخطها ويوصل للتاني, أو تقريبا أنا بدور علي حاجات تقريبا مش موجوده ومش هلاقيها في أي بنت, كنت ف كل مره بقرب من حد جديد, ااقول بس هي دي, هو دا اللي كنت بدور عليه, تعدي فتره صغيره بس وأكتشفها أكتر ألاقي نفسي مش حاسسها برضه, وأقول لنفسي لا برضه مش هي دي, وقلبي مفيش منه أي إشارات خارجه بتدل علي أن فيه حاجه, ف أبعد وابتدي أدور من جديد, مش هكتب مواصفات, بس أنا هكتب عن إحساس, أنا عايز أتخطف, انا عايز اول ما اشوفها اسمع نبضات قلبي بتدق أعلي من صوت رنه الموبيل وصوت لانا دل راي, عايز أول ما أشوفها ارمي كل حاجه ف إيدي والدنيا تسكت حواليا اول ما تحضر وعنيا ما تشوفش غيرها حتي لو كنا واقفين ف وسط زحمه, عايز انسي معاها اني كنت عايش قبل منها اصلا وتخليني احس ان اول نظره ليها كانت يوم ميلادي, عايز ألاقي نفسي رجعت اهتم بكل تفصيله فيا, عايزها تخليني احب كل حاجه بتحبها واسمع اغانيها واهتم ب أهتمامتها, عايزها تخليني كل دا من قبل ما تقولي وأقولها اي كلام مفيد, من الأخر عايزها تحيني وتاخدني لدنيا تانيه غير دنيتي الملله دي