مدونه مصطفي محمود

دايما بنبقي متخيلين أننا عندنا فرص كتير ووقت طويل، دايما بنكون فاكرين أنه لسه بدري، لسه فيه حاجه ممكن تحصل، لسه فيه صدفه ممكن تيجي، مناسبه من نوع ما هتفتحلنا طريق نقدر بيه نبدأ بكلمه، نصلح خلاف، نوصل ود مقطوع، مش بنبقي عاملين حسابنا لحسابات الزمن والقدر وترتيباته الغريبه، بنتكاسل وبنسيب كل حاجه لبكره، وفجأه بيجي بكره دا وهو سالب مننا اي فرصه وأي صدفه وأي إحتماليه لحدوث شئ، وبنقف نلوم نفسنا علي كل لحظه ضاعت مننا كنا نقدر بيها نعمل حاجه ومعملناش، ماتستنوش بكره، لو فيه كلمه او مكالمه او مقابله لازم تتعمل النهارده، دلوقتي، في الثانيه دي، أعملوها، متسبوهاش لبكره، ماتستنوش حد غيركم يبدأها، ماتعندوش نفسكوا ولا تعاندوا اللي حواليكم، مفيش حاجه مضمونه، مفيش وقت.

فكره التخلي عن الناس بسهوله مع أول موقف سئ يبان منهم أو حتي مع أأقل كلمه تضايقك فكره عظيمه, بتوفر عليك مجهود كبير, بتخليك أأقوي, وأحسن, ودايما مش فارق معاك حد, بالأضافه أنها بتخليك كمان عندك قدره علي إستبدال الناس بناس تانيه أحسن من اللي راحوا بدون أدني مشكله, العمليه بمنتهي البساطه بتكون عباره عن فلتر للناس اللي حواليك. اللي بيحافظ عليك بيفضل في حياتك, واللي يضايقك بيخرج منها, بدون أي تضيع ف وقت أو تحامل علي نفسك

فيه ناس وجودهم في حياتك بيوصلك لحاله من الاكتفاء الذاتي بيهم، بمعني أنك مش بيكون عندك رغبه أو أي فضول أنك تعرف ناس جديده غيرهم، ولو حتي علي سبيل التجربه، هما وبس، محدش بياخد مكانهم، محدش بيقدر يستحوذ علي إهتمامك بيهم، محدش بيوصل لغلاوتهم .. ومهما تشوف وتقابل ومهما يكون في ناس عايزه تتواصل معاك بتفضل يرضه مكتفي بيهم وبوجودهم هما وبس. حرفيا بتكون غرقان في تفاصيلهم، في طريقه كلامهم، اسلوبهم ، صوت الضحكه، كم الراحه النفسيه اللي بتلاقيه في وجودهم والسلام النفسي الداخلي وهما حواليك، أسلوب تعود عليهم رهيب بيخليك رافض اي أشخاص تانيه غيرهم .. هما وبس ..

كل شئ في الحياه نسبي, بيختلف تقيمه من شخص لأخر, مفيش معايير ثابته لأي شئ. مين وضع المعايير؟ مين أقر بصحتها؟ مدي كمال عقل وتفكير واضع المعايير؟ الأسس المتبعه لأختيارها؟ وهل كانت صحيحه أم خاطئه؟ ولذلك فكره تطبيق معايير مورثه لينا عن طريق السلف علي نفسك و إملاءك المستمر علي الأخرين بضروره تنفيذ هذه المعايير وبغض النظر عن صحه هذه المعايير من عدمه وبغض النظر عن ملائمتها ليك رغم إختلاف الزمن وبغض عن النظر عن إقتناعك بيها إقتناع عقلي يقيني وليس إقتناع من باب التقليد الأعمي وعدم المجازفه بأختيار معايير مختلفه, هي في حقيقه الأمر فكره خاطئه بشكل مثير للأشمئزاز هتقودك في النهايه لأسلوب حياه أشبه ب أسلوب بعض الحيوانات لا أكثر ولا أأقل .. مين وضع المعايير ؟

أعتقد أنه بيبقي شئ مؤسف لما بتلاقي ناس بتهتم بمظهرها الخارجي، بجمالهم كبنات وببناء أجسدهم كشباب علي حساب الأهتمام بمحتوي عقولهم، شئ مؤسف لما تيجي تتكلم مع حد سؤاء بنت أو ولد وتلاقي عقله خاوي، أسلوبه سخيف، مفرداته فقيره، أسئلته/مواضيعه/مناقشاته أتفه من التفاهه، عدم الأهتمام كليا بتغذيه عقلك ومهما كان شكلك جميل كبنت أو جسمك حلو كولد هيقلل من قيمه مظهركوا الخارجي بشكل ملحوظ، كبنت مستحيل أبدا هتتجوزي شخص كويس وانتي عقلك فقير، تفكيرك بطئ، أهتماتك محدوده إلا لو كان شخص فقير عقليا ز يك وبيفكر بنصه التحتاني فقط، وأنت كولد مستحيل هتتقدم في شغلك او تنجح في حياتك وأنت عقلك فقير مفيهوش أي إضافه تذكر، التباهي بعقليتك، بكم الكتب اللي قريتها، المفردات اللي بتمتلكها في ذاكرتك، زوقك الموسيقي من كتر ما سمعت ألوان مختلفه من المزيكا، إحتكاك بأشخاص مثقفه وواعيه فكريا وأدبيا عنك وأستفدتك منهم في نظري أفضل واقيم وأجدي من التباهي بشكلك وجسمك وجمالك الخارجي، المعادله مهمه ومجديه جدا بالأهتمام بالشقين وهتفيدكوا كتير، أسأل نفسك أنت فين من عقلك، راجع كلامك، المواضيع اللي بتفتحها مع اللي حواليك، زوقك في جميع مختل...

التعود .. التعود الوسيله الأمثل والأفضل والوحيده اللي بتساعد علي التغلب علي اي حاجه واي عقبه في حياتنا, كل حاجه في حياتنا في أولها وأولها بس بتبقي صعبه ومرهقه لجميع حواسنا,, بنبقي مش قادر نتحملها وكتير منا بيستسلم ويقف ويقول لا مش هكمل, لا مش قادر, مع أنه لو صبر وحاول يتعود علي الوضع اللي هو فيه مع الوقت هيلاقي نفسه طبيعي جدا ومتعايش مع الوضع دا بدون أدني مشكله, الصقر من الطيور الجارحه اللي بفطرتها مش بترضي تاكل اي لحمه ميته, الصيادين لما بيتصادوا الصقور, بيضطروا يغموا عينيهم لمده 8 أيام بعد صيدهم عشان لما يقدموا ليهم لحمه ميته يرضوا ياكلوها وميحسوش بحاجه, التعود, ال 8 أيام من التعود بيبقوا كافين لتغير فطره الصقر علي عدم اكل اللحمه الميته, اتعودوا علي اي حاجه انتوا مش حابينها هتتأقلموا مع الوقت عليها وهتكون سهله بالنسبالكوا, حد كنت بتحبه وفجأه بعد عنك وحاسس أنك هتموت وتكلمه, أتعود بس تعيش وانت بعيد عنه, هتلاقي الموضوع سهل مع الوقت, قصيت شعرك وحاسس ان شكلك بقي سخيف, أتعود بس علي شكلك وهتتقبله بعدين, أشتغلت حاجه صعبه عليك أتعود عليها ومع الوقت مش هتحس بحاجه وهيبقي الشغل با...

أنا تقريبا معظم مشاكلي مع الناس بسبب كلامهم ليا او معايا. مثلا .. الناس اللي بتتفق معايا علي ميعاد وماتجيش، والناس اللي بيأكدولي أنهم هيعملوا ومابيعملوش، والناس اللي بتقولي انت غير أي حد واطلع زي زي أي حد، أنا عندي مشكله مع الناس اللي بتقول كلام هي مش قصداه. كلام بيقوله وهما عارفين مسبقا انهم مش هيعملوا بيه. عندي مشكله مع الناس اللي مش بتحترم كلمتها ايا كان حجم الكلمه وموضعها. واللي كلامهم بيتولد كلام ويعيش كلام ويموت كلام وعمره ما بيتحول لفعل أبدا. عندي مشكله مع الناس اللي كلمتهم رخصيه ملهاش تمن. عندي مشكله مع الناس اللي كلمتهم بتتغير مع الوقت ..

الحياه؟ الحياه يا صديقي في المسافه, في المشوار الطويل اللي بتمشيه وتقف في نص السكه وأنت حاطط إيدك علي صدرك وأنت بتنهج وبتعاند وبتقول هكمل, الحياه في إحساس الدفا بعد ليله بارده قضتها وسط المطر وإيدك متلجه لو حطها علي النار تطفيها, الحياه في كوبايه القهوه اللي بتعملها بشغف عشان تظبط بيها إتزانك وتقف مستني قدامها لتفور وتضطر تبتدي تعملها من أول وجديد, الحياه في الشخص البعيد اللي خطف قلبك وروحك منك وأنت بتحاول تقربله مع كل فرصه تسمحلك ب دا, الحياه في الدافع اللي بيخليك تظبط المنبه بليل وأنت خايف لتروح عليك نومه ومديرك في الشغل يقولك كلمتين ملهمش لزمه, الحياه في ماشيك لوحدك وأنت مش عارف رايح فين, الحياه في قلقك اللي محدش عارف عنه حاجه غيرك, الحياه في الحكايات اللي عاشت جواك ومتحكتش لحد غير صورتك في المرايا, الحياه دايما في الحاجات دي اللي إبتدت ومكملتش للأخر, في النواقص والأحساس بالتوهان والطريق اللي نهايته قدامك لكن بعيده وسكته قدامك, الحياه ف الخوف المستمر وأحساسك ان دايما بكره مش مضمون, الحياه جوا التفاصيل البسيطه والأغاني اللي بتتعاد 100 مره والهدوم اللي لايقه عليك والصدف اللي بتغير ي...

ارجع واقول تاني انه هيبقي شئ لطيف لو قدرنا نقلل من المجاملات لمجرد بس إن الناس تعرف هما واقفين فين بالظبط من حياتنا. الغالب اننا بقينا بنقول كلام كتير احنا مبنبقاش فعلا قصدينه. او بنقوله كدا وخلاص عشان اتعودنا نقوله. بقي اي حد نقوله انت صاحبي. وانت حبيبي. ووحشني وعايز اشوفك ف وسط الكلام. وبحبك وانت غالي عندي. الكلام بقي مبتذل جدا ومن كتر ما هو بيتقال بقي ملهوش اي قيمه ومن كتر ما أحنا بنسمعه بقي مش بيجذب إنتباهنا، الكلام الحلو فقد قوته. قبل الابتذال دا ما يحصل لما كان حد بيقول   كلمه حلوه لحد كان الشخص بيتصعق من الفرحه. كان الكلمه بيبقي ليها تأثير كبير ف نفس اللي بيسمعها. وعشان كدا حاول وانت بتكلم يبقي كلامك موزون جدا. الكلمه بتطلع منك وانت فعلا قاصدها وحاسسها. لو بتحب حد قوله انك بتحبه ولو مابتحبوش متحاولش يبقي لسانك حلو وخلاص. محدش هيحس انه مميز عندك وهو بيلاقيك بتقول نفس الكلام اللي بتقوله لي بتقوله عادي جدا لناس تانيه كتيره. حددوا دايره معارفكوا وقربوا الناس اللي يستاهلوا قربكم ليهم. متستنفذوش كلامكوا الحلو مع كل الناس. خلو دايما الكلمه منكوا ليهم تمن مش كلمه رخيصه بتطلع لاي حد...