مدونه مصطفي محمود

هايلايت النهارده كان عباره عن محادثه لطيفه جدا مع صديق مقرب, قرب يتجوز. من عادتي دايما أني بحب اسأل الناس اللي ف علاقه حب عن إزاي عرفوا بعض, وإختصاراُ للكلام كان فيه بعض الجمل اللي إتقالت من صديقي دا أعتقد أنها كانت لازم تتحط في بوست أو تويتات والناس لازم تشوفها وتستفيد منها, من ضمن الجمل اللي إتقالت ان اهم حاجه في العلاقه فرق السن يكون قريب, ميكونش كبير لأن فيه حد في الطرفين هيتظلم يأما اللي سنه كبير هيضطر ينزل لعقل اللي سنه صغير, يأما اللي سنه صغير هيضطر يكبر عقله ويفوت حاجات كتير مفروض يعيشها في السن دا عشان يوصل للي سنه كبير, “ولو أن الراجل بمعاملته الوحشه للست قادر يخليها لو هي عندها 20 سنه تبان انها في الأربعين, وبمعاملته الحلوه ليها برضه لو هي في الأربعين تبان أنها عندها 20 سنه”, قال كمان أنه من ساعت ما إرتبطت بالبنت اللي بيحبها وهو بطل يبص علي البنات, خوفه من أن الموضوع دا يتحول لعاده عنده ف حتي وهي معاه عينيه تروح لأي بنت معديه خلاه مش حابب الموضوع وأن الأولي أن يوفر كل إهتمامه والشغف اللي جواه للبنت اللي بيحبها, ضاف كمان أنه عمره ما فكر يتجوزها عشان sex, الأهم من دا أنهم يعي...

إيماني بأن فيه أوقات مع أشخاص معينه ممكن ماتتكرش تاني, بيخليني مركز أوي ف كل ثانيه بقضيها معاهم ومستمتع بيها جدا, لدرجه أنهم بيبقوا مستغربني. مع أن الموضوع ببساطه أني ببقي حاطط إحتمال كبير إن القعده اللي إرتحت فيها النهارده ممكن معرفش اقعدهابكره, كريزه الضحك اللي جتلنا فجأه وأحنا بنحكي موقف ممكن متجيش تاني, شويه الصراحه اللي هجمت علي لساني فجأه وخليتني أقول كلام معين ممكن متسيطرش عليا تاني, ساعه الراحه والصراحه والفضفضه مع حد برتاح معاه ممكن متبقاش مهيئه ليا تاني, الصوره الحلوه اللي خدتها مع حد بحبه ممكن مايطلعش صور بنفس الحلاوه دي فيما بعد, فيه لحظات في حياتي كدا لما بعيشها وإتبسط بيها بيبقي جوايا إقتناع ضخم إني مش هعرف أعيش زيها تاني بالظبط بنفس الحلاوه كدا زي ما كانت. ودا لأن بكره دا مش مضمون والثوابت دايما في تغير والمتاح النهارده وارد جدا بكره يبقي مستحيل.

الولد ال unvirgin بيكون مقبول بيه إجتماعيا في أي مشروع إرتباط لما بيحكي عن علاقاته الجنسيه سؤاء كانت مره واحده أو مرات كتير وساعات بيبقي موضع إبهار للشريكه وبتبقي مبسوطه انها فازت بواحد كان مقطع السمكه وديلها، أما البنت ال unvirgin بتبقي مرفوضه تماما حتي لو كانت شخص كويسه وحست بغلطتها وغلطتها دي كانت عباره عن لحظه ضعف أو ثقه خاطئه في شخص ما. أحنا عندنا البنت لو غلطت غلطه واحده بس ف حياتها، غلطه واحده بس كفيله أنها تخليها موصومه بالغلطه دي طول عمرها ومهما صلحت من نفسها أو أثبتت أنها شخص كويس دا مابيشفعلهاش، عكس الولد اللي ممكن بيغلط ويتوب ويغلط تاني وتالت ويتوب تاني وتالت والناس عادي بتغفرله في كل مره.

من وسط مختلف المراحل اللي بتمر بيها علاقتك الأجتماعيه بشخص ما، من صعوبه البدايه وجذبه ليك وزرع الثقه فيه والتعلق بيه وظهور عيوبه والتأقلم معاها وتجاوز الخلافات ما بينكم بيجي الأستسلام علي رأس الهرم من حيث الصعوبه واللي بالتبعيه هيوصلك لهدم كل السبل اللي ممكن تجمع بينكم. الأستسلام ورفع إيدك عن الشخص دا، تركك لكل حاجه بتجمعكم ورا ضهرك ومضيك ف طريق بعيد مع كم لا يحصي من الأحاسيس المتضاربه من خوف وحيره وندم لو في يوم حسيت أنك إتسرعت مع عدم إمكانيه تعوضيه والأخطر عدم تقبل حياتك من غيره وخوف وحيره وندم في نفس الوقت لو إستنيت وقولت هحاول مره كمان، النقطه اللي بتقف فيها رجلك ثابته في الأرض، عقلك عاطل، لسانك متلجم وإيدك متكتفه والكون كله بيدور حواليك ورجلك مش قادره تحدد خطوتها القادمه سؤاء للأمام أو للخلف، الموضوع أشبه بالخروج من الوطن للمجهول مع الجهل ب أي شي تاني سواه. أنت مش عارف مستنيك إيه بره، مش مطمن للي جاي.

في يوم 18 مارس وتحديدا سنه 1993 اتجه بعض من السحرا والصيادين إلي القطب الشمالي، كانت مهمتهم عباره عن إختطاف بطريق صغير، وبالفعل قاموا ب أختطاف أحد البطاريق الصغيره من هناك، ثم قام ساحر من السحرا ب إلقاء تعويذه سحريه لتحويل البطريق المخطوف إلي كائن بشري ثم قاموا بتسميته ب إسم " كيرو محب " وإرساله إلي بلد ما تقع ف شمال أفرقيا تسمي مصر. كوني أحد الصيادين والمختطفين بيتحتم عليا ف هذا اليوم من كل عام أني أعمل عيد ميلاد لكيرو وأقوله كل سنه وأنت طيب يا كيرو وعقبال 100 سنه مع أمنياتي الطيبه بأنك متعرفش تفك التعويذه وتفضل كائن بشري زينا لأطول فتره ممكنه

بالصدفه البحته صادف وجودي قدام التلفزيون عرض حلقه من حلقات مسلسل ضمير أبله حكمت، كانت فاتن حمامه علي خلاف مع جميل راتب بسبب تصرفاته، وفي وسط المشاجره جميل راتب قال لفاتن حمامه؛ ‏"ضميرك اللي بتتباهي بيه دا لم يختبر" .. أنا وفقت عند الجمله دي كتير، ورغم جهلي بأسم السينارست بس الجمله فضلت عالقه في ذهني، ناس كتير بتعيب علي ناس تانيه بسبب تصرفاتهم أو أخطائهم بدون رحمه من غير ما يسألوا نفسهم لو لثانيه لو حصل وأتحطوا في نفس الموقف هيعملوا إيه؟ ضميرهم هيصمد قدام الأختبار الحقيقي دا ولا لا؟ هيضعفوا ولا لا؟ هل هما فعلا نبلاء ولا مدعين للمثاليه؟! عايز تهاجم حد وتحكم علي تصرف سئ عملوا مع السؤال بسخريه إزاي يعمل كدا؟ حط نفسك في نفس الموقف، أختبر ضميرك يمكن يكون ضميرك هش ونفسك أضعف من اللي بتهاجمهم بمراحل لكن مجتش الفرصه لضميرك اللي بتتباهي بيه أنه يختبر.