هايلايت النهارده كان عباره عن محادثه لطيفه جدا مع صديق مقرب, قرب يتجوز. من عادتي دايما أني بحب اسأل الناس اللي ف علاقه حب عن إزاي عرفوا بعض, وإختصاراُ للكلام كان فيه بعض الجمل اللي إتقالت من صديقي دا أعتقد أنها كانت لازم تتحط في بوست أو تويتات والناس لازم تشوفها وتستفيد منها, من ضمن الجمل اللي إتقالت ان اهم حاجه في العلاقه فرق السن يكون قريب, ميكونش كبير لأن فيه حد في الطرفين هيتظلم يأما اللي سنه كبير هيضطر ينزل لعقل اللي سنه صغير, يأما اللي سنه صغير هيضطر يكبر عقله ويفوت حاجات كتير مفروض يعيشها في السن دا عشان يوصل للي سنه كبير, “ولو أن الراجل بمعاملته الوحشه للست قادر يخليها لو هي عندها 20 سنه تبان انها في الأربعين, وبمعاملته الحلوه ليها برضه لو هي في الأربعين تبان أنها عندها 20 سنه”, قال كمان أنه من ساعت ما إرتبطت بالبنت اللي بيحبها وهو بطل يبص علي البنات, خوفه من أن الموضوع دا يتحول لعاده عنده ف حتي وهي معاه عينيه تروح لأي بنت معديه خلاه مش حابب الموضوع وأن الأولي أن يوفر كل إهتمامه والشغف اللي جواه للبنت اللي بيحبها, ضاف كمان أنه عمره ما فكر يتجوزها عشان sex, الأهم من دا أنهم يعيشوا مع بعض ويخروجوا مع بعض ويتصوروا مع بعض ويختاروا هدومهم مع بعض لدرجه أنه مابيحبش ومبقاش يعرف يختار هدومه غير لما تضيف رأيها في اللي هيلبسه, وكل الميزه في موضوع الجواز دا أنهم مش هيبقوا مضطرين في أخر اليوم يسيبوا بعض وكل واحد يروح علي بيت مختلف, وأن العلاقه اللي أهم حاجه فيها السرير بتكون أفشل علاقه في الدنيا وغالباُ مابتكملش لأنها بتتحول لعلاقه الراجل فيها عباره عن صرافه والست عباره عن خدامه أو جاريه, وفي الواقع دا من أهم وأعقل الكلام اللي ممكن أكون سمعته في موضوع العلاقات, وقصص الحب اللي بالمنظور دا بحس ان من كتر ندرتها لازم نتكلم عنها ونحكيها لناس اللي نعرفهم كأي حدث خارق للطبيعه مش بيحصل غير كل فين وفين